पोखरा ।
वडा प्रहरी कार्यालय बैदाम कास्कीको प्रहरी टोलीले यही साउन देखि हालसम्म विभिन्न मुद्धामा अदालतको फैसला भई फरार रहेका १०६ जना फरार प्रतिवादीहरुलाई पक्राउ गरेको छ ।
पक्राउ पर्नेमा लेनदेन तथा बैंकिङ मुद्धाका ८५ जना, अभद्र व्यवहार मुद्धाका ४, चोरी मुद्धाका ४, लागूऔषध मुद्धाका ६, वन मुद्धाका २, बाल यौन तथा अपहरण मुद्धाका २, हातहतियार मुद्धाका १ र घरेलु हिंसा मुद्धाका २ जना रहेका छन् । पक्राउ परेकाहरुबाट नगद ४१ लाख १२ हजार ४ सय ५ रुपैयाँ जरिवाना र ९ वर्ष ९ महिना १५ दिन कैद भुक्तान गर्न बाँकि रहेकाले लगत कट्टाका लागि अदालत पठाईएको प्रहरीले जनाएको छ ।
जिल्ला प्रहरी कार्यालय कास्की मातहतमा रहेको वडा प्रहरी कार्यालय बैदाम कास्कीको कार्यालय प्रमुख प्रहरी नायब उपरीक्षक सन्तोष निरौलाको कमाण्ड खटिएको प्रहरी टोलीले हाल फरार अपराधी पक्राउमा सफलता प्राप्त गरिरहेको छ । गण्डकी प्रदेश प्रहरीले यो आर्थिक वर्षमा हालसम्म प्रदेशका ११ वटै जिल्लाबाट २५६ जना फरार प्रतिवादी पक्राउ गरिसकेको छ ।
