काठमाडौं, वैशाख ११
देशका विभिन्न भागमा बुधबार भएका छुट्टाछुट्टै सवारी दुर्घटनामा पाँच जनाको ज्यान गएको छ भने केही घाइते भएका छन्। दुर्घटनामा परेका मध्ये अधिकांश मोटरसाइकल, बस, ट्याक्टर र अन्य सवारीको ठक्करबाट मृत्यु भएको प्रहरीले जनाएको छ।
धनुषामा दुईजनाको मृत्यु
धनुषा जिल्लाको धनुषाधाम नगरपालिका–३ सर्सामोडस्थित सडकमा बुधबार राति एक बयलगाडासँग मोटरसाइकल ठोक्किँदा २१ वर्षीय राजेश खत्वे मण्डलको ज्यान गएको छ। धनुषाधामबाट तेजनगर जाँदै गरेको मोटरसाइकलले ठक्कर दिँदा मण्डल गम्भीर घाइते भएका थिए। उपचारका लागि प्रादेशिक अस्पताल जनकपुर लगिए पनि उनको मृत्यु भएको हो। मोटरसाइकलमा सवार अर्का एक व्यक्ति घाइते छन्, जसको स्थानीय क्लिनिकमा उपचार भइरहेको छ। बयल गाडाका चालक भने फरार छन् र प्रहरीले खोजी गरिरहेको छ।
त्यस्तै, सोही जिल्लाको मिथिला नगरपालिका–३ लालभित्तिस्थित सडकमा ना.५ ख ६१०० नम्बरको बसले ठक्कर दिँदा ७६ वर्षीया पैदलयात्री दुर्गा देवी महत्तोको घटनास्थलमै मृत्यु भएको छ। बस चालकलाई प्रहरीले नियन्त्रणमा लिएको छ।
धनकुटामा ट्याक्टर दुर्घटना
धनकुटा नगरपालिका–९ रूद्रबारीस्थित सडकमा को.२ त ७९३४ नम्बरको ट्याक्टर अनियन्त्रित भई दुर्घटनामा पर्दा शहिदभूमि गाउँपालिका–७ निवासी २० वर्षीय बिबेक बगाले (थापा) को घटनास्थलमै मृत्यु भएको छ। दुर्घटनापछि ट्याक्टर चालक फरार भएका छन् र खोजी भइरहेको प्रहरीले जनाएको छ।
नवलपरासीमा साइकल यात्रीको मृत्यु
नवलपरासी पश्चिमको सुस्ता गाउँपालिका–३ बिगेपस्थित सडकमा हाल नम्बर नखुलेको मोटरसाइकलको ठक्करबाट साइकलयात्री ४० वर्षीय जोखन कोईरीको लुम्बिनी सिटी अस्पताल बुटवलमा उपचारका क्रममा मृत्यु भएको छ। ठक्कर दिने सवारी र चालक दुवै फरार रहेका छन्।
मकवानपुरमा अनियन्त्रित मोटरसाइकलले लियो ज्यान
हेटौंडा उपमहानगरपालिका–११ नवलपुरस्थित सडकमा बुधबार राति प्रदेश २–०३–०१३ प ४९२१ नम्बरको मोटरसाइकल अनियन्त्रित भई दुर्घटना हुँदा २४ वर्षीय उमेश तामाङको मृत्यु भएको छ। सिएमसी चुरेहिल अस्पतालमा उपचारको क्रममा उनको मृत्यु भएको हो। मोटरसाइकल चालक घाइते अवस्थामा सोही अस्पतालमा उपचाररत छन्।
