नेपाल कम्युनिष्ट पार्टी (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले म्याग्दीको समग्र विकासमा प्राथमिकता दिने बताएका छन्।
बेनी नगरपालिका–४ सिङ्गा र तातोपानीमा आयोजित कार्यक्रममा उनले भौतिक पूर्वाधार र पर्यटन विकासले म्याग्दीको उन्नति हुने उल्लेख गरे। “छ वर्षअघि पनि म यहाँको तातोपानी कुण्डमा परिवारसहित आएको थिएँ,” उनले भने, “त्यसबेला यहाँहरूले उठाएको बेनी–दरवाङ–ढोरपाटन सडक, तातोपानी कुण्डको संरक्षण, प्रवर्द्धन र नदी नियन्त्रणसम्बन्धी योजनामा बजेट व्यवस्थापन गरी थालेका कामलाई निरन्तरता दिएका छौँ।”
पूर्वप्रधानमन्त्री दाहालले दोस्रो कार्यकालमा प्रधानमन्त्री हुँदा बेनी–दरवाङ, बेनी–जोमसोम–कोरला, बेनी बजार संरक्षण योजना सुरु गराएको स्मरण गर्दै पछिल्लो कार्यकालमा तातोपानीको बस्ती संरक्षणका लागि विनियोजित रु दुई करोड बजेटबाट रु १० करोडको बहुवर्षीय योजना कार्यान्वयन सुरु भएकोमा खुसी व्यक्त गरे।
उनले बेनी–दरवाङ सडकको प्रमुख समस्या बनेको फापरखेत पहिरोको विकल्पमा म्याग्दी नदीमा बेलिब्रिज जडानका लागि पहल गर्ने प्रतिबद्धता जनाए। सो अवसरमा गण्डकी प्रदेशसभा सदस्य रेशमबहादुर जुग्जाली, हरिबहादुर भण्डारी, बेनी नगरपालिका–४ का वडाध्यक्ष अणबहादुर खड्का (भगवान), सिङ्गा तातोपानी कुण्ड व्यवस्थापन समितिका अध्यक्ष कृष्ण खड्काले सिङ्गा र तातोपानीको विकास निर्माणबारे जानकारी गराए।
अध्यक्ष दाहालले बेनी नगरपालिका–४ ठूलोखोला, सिङ्गा, बेनीमा सहिद परिवारसँग भेटघाट र साक्षात्कार गरे। उनले सहिद परिवारको अवस्थाका बारेमा जानकारी लिँदै सहिदहरूको योगदानको उच्च मूल्याङ्कन गरिने बताए।
सिङ्गामा स्थानीय किसानको गुनासो सुन्दै, कृषिलाई प्रविधियुक्त बनाउन, बजारमा सहज पहुँच उपलब्ध गराउन र उत्पादनमा आधारित अनुदानको व्यवस्था गर्न माग सुनाए। उनले प्रधानमन्त्री हुँदा कृषि अनुदानका लागि रु सात अर्ब बजेट विनियोजन गरेको उल्लेख गर्दै सरकारलाई त्यसको कार्यान्वयनमा ध्यानाकर्षण गराउने प्रतिवद्धता व्यक्त गरे।
