बागलुङ : भारत-चीन जोड्ने राष्ट्रिय गौरवको आयोजना कालीगण्डकी कोरिडोरको बागलुङ खण्डमा धमाधम काम भइरहेको छ। त्रिदेशीय सडकका रूपमा रहेको कोरिडोर कालोपत्र हुन थालेपछि यात्रा पनि सहज बन्दै गएको छ।
१४ वर्ष अगाडि शुरु भएको कोरिडोर आयोजना हालसम्म बागलुङ खण्डमा करिब ७५ प्रतिशत काम सम्पन्न भएको छ।
आर्थिक वर्ष २०६७-६८ देखि शुरु भएको आयोजना अन्तर्गत बागलुङमा दुई खण्डमा काम भइरहेको हो। गुल्मीको कालीगण्डकी गाउँपालिका- ६ र बागलुङको जैमिनी नगरपालिका–८ को सिमाना पालुङखोलादेखि मालढुङ्गासम्म ३४ किलोमिटर सडक बागलुङमा पर्छ।
उक्त खण्डमा दुई वटा ठेक्का लगाएर काम गरिरहेको कालीगण्डकी करिडोर आयोजना कार्यालय पाल्पाका सूचना अधिकारी इञ्जिनियर अरुण खत्रीले जानकारी दिए। उनका अनुसार हालसम्म आठ किलोमिटर कालोपत्र भइसकेको छ भने २६ किलोमिटर सडक भने फराकिलो बनाउने कार्य भइरहेको छ। धेरै ठाउँमा सडक कालोपत्रका लागि तयारी भएको भन्दै अहिले चिसोले गर्दा काम रोकिएको उनको भनाइ छ।
पालुङखोलादेखि बलेवासम्मको २४ किलोमिटर कालिका कन्स्ट्रक्सन र बलेवादेखि मालढुङ्गासम्मको १० किलोमिटर खड्का-कृष्ण-बीएन जेबीले जिम्मा लिएर काम गरिरहेको इञ्जिनीयर खत्रीले बताए। उनले भने, ‘बागलुङको दुई वटै खण्डमा धमाधम काम भइरहेको छ, पहिले बजेट कमी हुँदा तीव्र गतिमा काम हुनसकेको थिएन, अहिले पनि पर्याप्त बजेट छैन, यद्यपि काम चाहिँ भइरहेको छ, साढे आठ किलोमिटर सडकमा कालोपत्र भइसकेको छ, अन्य बाँकी सडक पनि कालोपत्रको लागि तयारी अवस्थामा छ, गर्मी याम शुरु भयो भने काम हुने छ।’
कोरिडोरले बागलुङको जैमिनी र बागलुङ नगरपालिकालाई जोडेको छ।
जैमिनी नगरपालिकामा १९.५ किलोमिटर र बागलुङ नगरपालिकामा १४.५ किलोमिटर पर्छ। तीन देश जोड्ने कारिडोरले बागलुङमा ठूलो सम्भावना उजागर गरेको जैमिनी नगरपालिकाका उपप्रमुख हरिहर शर्माले बताए। सडकले व्यापार व्यवसायसँगै पर्यटन प्रवर्धन नमो ठूलो टेवा पुर्याउने उनको भनाइ छ।
‘कोरिडोर एउटा देशमा मात्रै छैन, यसले तीन देशलाई जोडेको छ, त्रिदेशीय सडकले दक्षिण बागलुङका आम नागरिकलाई ठूला शहर पोखरा, बुटवल र भैरवाहसँग पहुँच विस्तार गरेको छ, धार्मिक पर्यटनको क्षेत्रका रूपमा विकास हुँदै गएको छ’, उनले भने, ‘अब गाउँमा उत्पादन भएका वस्तु सहजरूपमा बजारीकरण हुने छन् भने व्यावसायिक वातावरण तयार भएर बसाइँसराइ रोकिने छ, कोरिडोर पैसा बोकेर आएको अब यसलाई समात्न सक्ने क्षमता हामीहरूले राख्नुपर्छ।’
नवलपुरको गैँडाकोटदेखि कोराला नाकासम्म ४९५ किलोमिटर रहेको कोरिडोर बागलुङको मालढुंगा २४० किलोमिटर लामो रहेको छ। यसले मुस्ताङ, म्याग्दी, बागलुङ, पर्वतसहितका जिल्लाबाट बुटवल, भैरहवा र भारतसम्म पुग्ने यात्रासमेत छोट्याएको छ।
