सुरेशराज अधिकारी÷पोखरा
करिब ३ महिना अघि वैदेशिक रोजगारीका लागि बाग्लुङ काठेखोला–५ का कृष्णबहादुर विक दुबई गए । दुबईमा गएको केही दिनमा उनले एक निर्माण कम्पनीमा इलोक्ट्रोसियनमा काम पाए । उनलाई मासिक तलब एक हजार ( दिराम) दिने भनिएपनि ९ सय मात्र पाउथे ।
करिब ४०÷४५ दिन काम गरेपछी उनको शरिरमा समस्या आउन थाल्यो । काम गर्ने क्रममा सामान उठाउँदा उनको खुटामा आवाज आउन थाल्यो । खुट्टामा समस्या देखिन थालेपछि उनी काममा जान सकेनन् । काम नगरेपछि उनको तलब बन्द भयो । कम्पनीको व्यक्तिहरुले बीचबीचमा उनलाई अस्पताल लगेपनि उनको दुखाइ भने ज्यूँको त्यु नै रह्यो ।
दुबईमा भनेजस्तो उपचार नपाएपछि उनी नेपाल आउन चाहान्छन् । तर उनी नेपाल आउन पाएका छैनन् । नेपाल फर्काइदिने भन्दै उनले कम्पनीमा आग्रह गरेपनि उचित वातावरण नमिलेको कुरा उनले निदान मिडियालाई पठाएको भिडियोमा व्यक्त गरेका छन् ।
उनी तीन महिना अघि नमस्ते नेपाल मेनपावर प्रालिको पोखरा शाखाबाट दुबई गएका थिए । उनलाई नेपाल फर्काउनको लागि कम्पनीले ४ हजार ५ सय (दिराम) मागेको छ । उक्त रकम समेत तिर्न नसक्ने अवस्था आएपछि उनले सामाजिक सञ्जालमार्फत नेपाल फर्काइदिन गुहारेका हुन् ।
नमस्ते नेपाल मेनपावर प्रालिको पोखरा शाखाकी सञ्चालक निकिता पुरीले कम्पनीलाई ४ हजार ५ सय (दिराम) तिनुपर्ने बताइन् । उनले कामदारमा कम्पनीको लगानी भएको कारण सोही चार्ज मागेको धारणा राखिन । श्रम स्वीकृति लिएको कारण नेपाल सरकारले पनि आर्थिक सहयोग गर्ने उनले सुनाइन ।
